POESIE WOLOF
Forgeron, c'est en travaillant le fer que l'éminent poéte Libasse NIANG gagnait sa vie.Mais, il s'est révélé être aussi un habile artisan dans le maniement de la langue wolof.La richesse des rimes et le rythme musical des poémes chantés qui suivent en sont un témoignage éclatant.
Il clame avec conviction profonde et puissante sa foi en la mission d'Envoyé de Dieu de Seydina Mouhamadou Limamou Laye(1883-1909), fondateur de la conférie Layéne du Sénégal.Il porte d'ailleurs l'un des surnoms de Seydina Limaamu(Libasse), qui aurait béni sa langue le jour de son baptême.
Il vécut dans les villages de Cambaréne et Malika ou il forgeait des outils aratoires pour les agriculteurs.Mort en 1944, à l'âge de 40 ans environ, il est loin d'être oublié.
Aujourdhui encore on chante avec beaucoup de ferveur ses poémes, durant les nuits de veillée religieuse.
1 - BISMI LAAHI RAHMANI RAHIMI
Baay laay amul mass
Njool yaay boroom diine
Xallal nga nu yoon
Leeral nga ngirum diine
Yeen geum yi kaay leen nu waxtaan
Fii ci kagn Baay Libaas,moo fégn ci Soodaan
Te noo nampoon wolof miin ko lool
Jii wax araamul, ci laay, kagn Seydi Soodaan
Baay Laay a leen yay ci tééré Yalla,Buur bi nu moom
Xamxam ba nekkoon ca Maxfuus,moo ko saytu woo leen
Waar leen ñu gantu,geum yay sellel ba rilwaan
Bu leen wutal Baay Laay maas nde bonte mu ñaaw
Yonnent akub seriñ duñu benn ba diy maas
Njiin jãngul,bindul,dajalewul tééré di ci seet
Yalla ko yonni muy woote diine lislaam
Baay Laay newul"baa siin mimmara ak liif laam"
Jaaxal na walliyu waxumaak fooroya juy waare
Dogonkoon ak réér ngeen jebbeul ko Lislaam
Maam Aadamaa tiim ña mu feekkoon ba tén ba laa woor
Malaaka yay sujjoot ngir leeru Yonnent ga ca moom
Laay laay la Laahu ja mo xotti gémmeuñ ga leer ya saawaan
Yooyay junjugn réy na,danu koy woy ba Diiwaan.
Xam naa ci say jiko ñatti tééméér
Dadul jeex,am nga kiraama
Sak mbaax réy na ku lim juum
Rafet jikko muñ gu yaa
Xam-xam budul jéex,yaatu taaru tabe
Mandu,am diine amuk leer
Baay laay ba muy waaja feeñ,biddééw la andal bu leer
Way réér ya naan biddeewub laar,way gëm ya naan bidééwub leer
Loolu bir na leen,Séydéey "nooru lislaam"
Baay Laay dafa feeñ samp raayi jullit waar leen
Bu ngeen gëmoon jëfu Buur Yalla du ngeen tuuba yeen
Mbooleem nit ak jinne kaay leen xañtu lislaam
Sunu Buur la nuy woy di tagg Yonnent bi aleyhi salaam
Baay Laay a woote lislaam,gëm leen ko,man woolu naa
Yaakaar,ku kañ Seydi am ngag may fa Diiwaan
Yaa naawewoon Makka,yanu leer yaak sunuy ruu
Ba ngay cëppéelu ngor,riir wa dektu Rilwaan
Ku gëm nu gëm,ku bañ dunu taggo ba Diiwaan
Njool ma cëppéélu biir Yoof,leeram ga dem Kambaréén
Jénéer ba dem Beyti Maamur "saalihina" ya teew
Ña gëm fa Ndar woolu,Waalo gëm te kontaan
Ñoñam ya wër ko di sabba,bañ yaa nga dééta waay
Wax leen ci waa ji,balaa siiw sanku,nan dem ca Buur
Pikin dañoo jeeex,maam jaa wootewoon diiné
Ngëlëm dafa réy,te réér metti ma di jooy
Ku doon siyaar Nabi,Yaaram baa nga biir Jammalaay
Ku daan bégé Seydi Issa war nga ñëw tuuboo
Yallaa la tannoon ci biir Yonnent yi,def la ngay njiit
Yaa moom juroom ñaari diiwaan,xawsu mandi ngay leer
Deeful wëjjéek yow nde yaa leen mën fa diiwaan
Ba Baay demmee taaxi Béér,tuut koon kiraamaam ya feeñ
Dëndug nawet jib na noor,boobéé ba tey ken du laal
Baay Laay kerook ñay wu weex tiital na waa Béér
Sëriñ si daa mawwu dugg xalwa di seeti Baay Laay
Bëtub kiñaan daan na mbémpeen ba boroom réér
Man dey dama yéém ñi ko wéddi te muy moom
Bu leen werante biib taal yonnent a ko taal
Ku ci xamul te di xamxamlu baña laaj
Yellonte ngay kaague mbaa fooreya di nga réér
Lëndëm ga sank la doo seerooti "ridwaan"
Ku fekkewoon ba ngay woote xam ne yaay ki fi man
Xérëm yu réy ya ca biir Yoof,xamb yaak ña kay muur
Semmal nga leen ba ñuy jaamu Yalla,ken dootu yow
Yonnent bi,yaay mbër mi xalloon yoonu lislaam
Xamxam,lu muy jariñ,lu moy jëfe ko,digal ko saw gaay
Bu loolu lépp nekkul,moo jaa,ku fiy wonew yoon
Subhaana xamxam bu lay wommat jëme Saam
Wax ja moo lay gétën ngay layyoo jëme naari
Yonnent fu mu mosa feeñ,Yééfeer ya bañ ko diy noon
Ña donn ay kaggu,ñooñaa koy werante ba Saam
Ña teela gëm naan fa Zam-Zam,am fa ridwaan
Yoow waat nga wacca nga,yaa woote jubël diiné
Birël nga sap woote,doo layyoo ba ken di la yay
Yembal nga jox Seydi,muy ommat ba diiwaano
Yow waat nga wacca nga,yaa woote jubël diiné
Doo bayyi waxtu,do tooñ,doo naññ kenn,sallaaw
Sellal nga saw yoon Baay rafet diiné
Yow waat nga wacca nga,yaa woote jubël diiné
Naroon na noo sanku,noo ngi jaamu ken dootu yow
Yonnent bi yaay mbër mi xalloon diine lislaam
Baay Laay ne seytaane raay na boppi mbindééf yi
Ba Baay nelawee la gééj tiit,neex ba nuy naan
Dogoon ak réér ngeen jébbël ko Lislaam
Ku koy werante da nga laajul ñi doon jééma bañ diinéém
Kalaame kook buur,ba Baay duggee gaal
La gééj sabbaa,Aras jayoo
Ba Boroom Aras yëngoo Baay Laay waasuwul Béér
Xaybar la Yééféér ya fitnaal noon ya ñuy seeti Njiin
Njool ma feeñu leen ca tisbaar ngir yërmëndeem ju réy
Ak bañ gëm ya weddi,Baay Laay yaa rafet diiné
Ñu nga naa kaayleen ñu wër Goor gi,seet njañ li muy muur
Mu ne leen reew ngeen,nde suma njañ li bu ngeen ko dee laal
Asamaan daldi tappok suuf,gééj ga baawaan
Ñu nga naan tey jii nu gis njañ lu mosul feeñ lu tey
Nëbbub Yalla jomb na jaam gis ko,Njiin du seen maas
Kéwél ga daldi f¨éx,gaa ña tiit ba daw tasaaroo
Ba ñu laa yembaat la Baay Laay japp bay ñaan
Moo simpi xamb ya,taxawal diine Lislaam
"Xaatimi nabi-iina" sunu Yonnent bi woy leen ko
Moo leeral sunu xol ba sunu tur dem ba diiwaanoo
Nuy muslu séytaane,kiy raay boppi xam ya ñuy réér
Diggënte rafle waak xiif waak mar wu tar wa ca Saam
Na ump gaa yay dëggal Yonnent ba Diwaano
Lay jeex na Njiin jib na Diwaan wacc biir Yoofi gééj
Tambur ba jib na,muy baatub Laa illaa Laah
Li Yalla def bir na miim rééw,dootu fey abaadaa
Japp ak Julléék woor la nuy salloo ba rilwaan
Japp ak julléék woor la nu Yonnent bataleel
Goor ak jigéén ndaw ñépp da ciy maase
Yonnent a ngay nelaw te bu yeewoo nu kontaan
Kañ leen boroom ngir mi,Baay Laay mooy dindi réér
Yaa nuy dindil tiisu bammeel may nu xééwël ca biir
Firdawsi,Kawsaray baawaan nuy sanguy naan
Yaa daagu jëm Pééy bu réy bi,ñépp sew na ci moom
Dééyaale faak Buur ba,ba mu tampeel la,yaay Ruuhu Laahi
Yalla la may yaa di njiitu "ahlu Soodaan"
Yow yaa jëkkoon feeñ,di jantub diine,bir na ci moom
Leer yaa ngiy baawaan ba Soodaan siy xëcco may gi ñoom
Dañoo xamul Xawsu,Baay Maanaay boroom diiné
"Anta Lamiin nga yaa Rohu Xudusi nga Séydil xalaa-ixi
Yaa samsu Samaanun,wa yaa nuurun bilaadi
Seydi Ruuhu min na Laahi
Ilahiinaay pééy ba,noo séqë taabal ja nook Maam
Firdawsi kontaan na ngir nun ñiydëggël ñaari leer
Bu ngeen yaboo maare,am ngeen mbër fa Diiwaanoo
Bu leen iññaanante ngir nun Buur bi nuy jaamu moo sakkoon
Mbugëg,mbégte,te nuy ñaan mbég mu réy ma ca biir
Firdawsi,Séydi yaa nuy omat ba Diiwaanoo
Yonnent la nuy woy,bu leen dignat cofeel gu tar la
Xol fees na bay tuuru,gëm woy leen boroom diine ji
Bañ yaa ngi suumurlu,nuy kontaan ba Diiwaanoo
Sa wird wi,da nga ko jaayul,nde bonte nga riis
Sakkuwoo ku lay siiwal,wees nga puukëre laay
Yaa jiituwoon gaa ña Diiwaan tann lislaamoo
"Lay laa illa Laahu,Jëlliilu Zikru Rabbaani"
Bi Laahi ku bañ xawssu,doo seerooti Yonnent ba naan
Lay laa illa laahu,leer gay jolli ba Diiwaanoo
Al hambdu li laahi,sunu Yonnent bi doy na noo laay
Nee na yeen gëm yi,am ngeen ngënéél,Yallaa ma wooteloo
Ngeen ñëw,japp leen ci laay-laay
Japp ak julleek woor la nuy salloo ba Diiwaanoo
Ab jant fenk na biir Yoof,guy gindik réér
Réylu ak way-réér la ñu fallas ca niiraan
Tee ngen a waaxu ñëw laaj Séydi boroom diinee
Tambur bu réy ba fa Buur Yalla la ñuy jiin
Sunu yaaram bu tedd bi Séydi Ruuhu Rahmaan
Makkaak Medina ba Saam raññe na say leer
Sunu Yonnent ba mu bayyikoo Beyti Maamur la feeñ
Yaraax la wacci,gis ñi ko jangoon te raññeewuñu
Ñuy séénu kaw,Njool ma war Jakkeer ja xuus ci seen biir
Jullééji Baay Laay,Yaraax werante,nuy wooloo
Yaaram bi tiim nga say maas,Buur Yalla def na ko jéég
Sëriñ si bañ dañoo réér jomlu nde bonte ñu laaj
Xatmun tariixa bi Isaa ibnu Maryaamaa
Nooru Nabi nooru Issa ibnu Maryaamaa
Yaaram bi donn ngay leer,sellal nga yoonu lislaam
roy leen ci Séydi moo nuy ommat ba Diiwaan
Nun kay nu ngiy gaajo leeram yu tar yi nuy naan
Bañ yaa ngi nuy xas,da nuy sabbaa,du nook ñoom
Looloo di seen diine,seydi am nga rilwaanoo
Tammal nga say gune ñuy xam yoonu Yalla bay mag
Yéénétunoo bayyi lislaam,yaa nu won yoon wi
Tampees na nuy tur ca Diiwaan,yaay boroom diinee
Farlook a dem jakka,fatte toppatoo ndaw,te boo soxlaa di leen pampe
Lii layyoo la daan jur fa Saam,lileey mbasun diine
Roy leen Njool boroom diinee
Kuy xañtu lislaam te doo lakkal xaleel won ko yoon
Doo teela may gune ag buum,muy moyug tooñ ci moom
Loolooy mbasun diine,roy leen Njool boroom diinee
Bul xeeb wolof lee nga fatte,deglu naa la ñuy wax
Xam leen ne bët da dul suur,dee doora gëm du ngënéel
Ñi daan werante Yonnent layyo ji nañ Saam
Ku fekkewoon woote baak naaféq yaak ña gëmoon
Dellooti daw ngir ga banneex,topp dunyaa ba dee
Ku dem ñu ngay réccu layyoo ba fa Saam
Limaamu Laay,Mahdiyu xayrul waraa Muhamadu
Bu ngeen xamul goor gi,moo feeñoon ca Makka,muy baax
Mu dellu feeñ Yoof,Waa rééw may xëccoo yoonu Makka
Dañco xamul muj ga,Baay Maanaay boroom diinee
Loo tayyi ñakk nga,loolaa réccu fekk mu wéy
Nan daan bakken yi,te tuub sellal,ku réy da ngay réér
Roy leen ci Séydi moo nuy ommat ba Diiwaan
Mbooleem li fiy fooreya duñu dab Abdulaay bun Salaam
Laajam bu réy bu réy ba mu doon laaj Yonenti Yalla Nabi
Te noon bu koy xam na ngeen tuub,booba mooy Mustafa
Mu waxko lépp,mu yéém ba waaru far tuub ci moom
Dellook Xaybar naa tuub leen Muhammadu feeñ
Xaybar la yééfeer ya jéex ngir dor yu tang yay dal
Malaaka yaay wacc,Buur Yallaay dimmëli sunum njiit
Roy leen ci Séydi moo nuy ommat ba Diiwaanoo
Yallaa la yonni nga feeñ Makka ñu bañ diinee
Nga sanc Medina,leer gay jolli ba Saam
Beyti nangul na la,Faas gëm na sa diine
Nga dellu feeñ Yoof,ñooña bañ diine
Nga sanc Kambareen,leer gay jolli ba Malika
Yëmbël nangul na la,Ndakaaru gëm na sa diine
Saa Baay Limaamu kiy njiit,Buur,Yalla may na ko moom
Yaaram yi xam na ko,moo dekkal ngiram Nabi Laay
Jébbël ko Baay Séydi muy daaral pomu diinne
Yow yaay Liimaan,wa lislaam,wa lihsaan,la ka ridwaan
Saw tur la ñuy tampe,soo yeewoo tabala ya jiin
Laay laa illa Laahu,leer gay wéy ba Diiwaanoo
Sunu rombukaay bii di dunyaa
Buñu fi def lu ñuy lor
Na ngeen xam ne goor gu feeñoon fa Makka
Moo dellu feeñ fii ci Yoof
Moo nuy jallé ëllëk
Baay Laay yay boroom caabi yi.
2 - BISMI LAAHI RAHMAANI RAHIIMI
"Allaahu ma salli allaa Seydinaa Muhamadu
Salli wa sallim,yaa Rabbi,salli a laa Muhamadu"
Saa maam Limaamu wooté na
Ba "Lanbiyaayi" woolu na
Te Ruuhu Laay jiitu na
Di lampu leeri Medina
Yaaram bu yiw bi wacc nga
Yaa Ruuhu Laay tedd nga
Ku koy werante weddi nga
Su ma yabo ne sanku nga
Yalla la yonni ngay Nabi
Ngay seen gënéél ginnaaw Nabi
Liggééy nga,am ngërëm lëmbe
Sa ñaari leer yi jolli na
Ñaari ngërëm nga boole,am
Nga ndam sa may ga yaatu na
Firdawsi ngay tëggoo junjung
Yaa Séydi moom nga tuumë ja
Gëm léen te woolu tey dëgël
Di sant Laahu kiy ndimmël
Buur Yalla moo la may,Rasuul
Nu gëm ko woolu diine ja
Yaa xalla yoon wu réy wu yaa
Wu jëm ca pééy yu magg ya
Sa ngir mi leer na noo ngi jaamu
Bañji diiné pertana
Fekkon nga yoonu diine sew
Ba nééw ji doole yépp daw
Nga xalla yoon wi,yaa fi raw
Ku fonk jamu waaxusil
Goor ak jigéén di taalibe
sikkar sa riir fa baabu ba
Ba xol ya buur digaani ba
Amiin ja,doy na noo jubël
Xamxam ba raw na foore ya
Jaaxal na lawliya yi ya
Yaa jiité lanbiya yi ya
Diiwaan bi yaa di seen ngënéél
Yaa saytu diine jiy defar
Jullit yi,sant leen lu war
Ñiy xantu diine ngir sa leer
Ñuy topp tééré ya di jiir
Ñi weddi Njiin dañoo xamul
Ki mën ci diiné,noo dëggal
Da ngeen a laajul kiy jubal
Nde moo di goor gu laabiir
Jom-jomlu jommi fey na ko
réy-réylu,réér it fey na ko
Xamul na laaj ñu wax ko ko
Ci yoonu diine mooy li war
Damaa gisul ku mel ni Maam
Limaamu Laay te dégguma
Ku wax ne Yalla moo ma yonni
Moo ko wax nu woolu ko
Gëm seede leen ne sant naa
Ki tax ma seeru Séydinaa
Ba gëm ko,naa ko "aamanaa"
Ku woolu sant war na la
Sëriñ sa toppu tank ba
Saa bay Libaass ne maay boroom
Kuy xañtu weer ba jant fenk
Xamal ne leer ya wër na la
Njaal-all yeek njanaaw yi ñook
Garab yi boole gëm na ñoo
Nit ak jinney werante,noo
La woolu,Seydi tedd nga
Bu gaalug Baay Libaas riddéé
Ba gëm yi naani Kawsara
Kerook,ñi gantu Baay Libaas
Di ñee ñi gëm ca kump ga
Ñi tëx te buur dañoo tëkkaale
Mahdiyook i walliyu
Ka wax ne Yalla moo ma yonni
Kooka moo di Nabiyu
Araab yi ak Tubaab yi ñoo
Jëkkoon ci yoonu Nabiyu
Wolof di xaar mujjug jamaana
Maam Limaamul Mahdiyu
Yaaram ba feeñ na ciy leboo
Xërëm ya tiit na bay faboo
Boroom ngënéél la nuy xaboo
Yaa woote diine,noo wuy yoo
Subhaana maa ko yéénéwoon
Nu boole xol yi ndax nu man
di jéém a roy ñi jiituwoon
te aw ci yoonu Muhammadoo
Lu fiy jullit nu bokk Ndey
Da gaan ci Buur bi leeri pééy
Ndax Buur jubal sunub liggééy
ci lampi leeri Muhamadoo
Yonnent yi wootewoon li laahi
dakkantalees na leen ci Laahi
Ku dee te doo"aduuwa"Laahi
di Abdalaahi Muhamadoo
Nabee dikkoon ne jaamu leen
Yonnentub Yalla ñeel na leen
Ku weddi kii dawal keneen
Te génn yoonu Muhamadoo
War ngeen na xam ne jangu neen
Te jëfewoo ko moo di ten
bu teey bu neex te doo ca naan
Gojam ba ñeel na Muhamadoo
Moo tax ba Baay Libaas ne leen
da ngeen di wax te laaju leen
War ngeen a gaaw ma atee leen
ci yoonu Diine Muhamadoo
Xamxam ba woon ca Mustafaa
Du jééx te lënt nekku faa
Bu kaan sottee mu tuuru faa
Lu mankewul la Muhamado
Araab du jël wolof déjoo
Ndax gëm yépp janguñu
Ñi mel ni man dañuy béjoo
werante sarti Muhamadoo
"Laa ilaaha illa Laahu Muhamadoo
Rasuulu laahi waahidun
Rabbul Jalliilu Majiidun
Salli alaa Muhamadoo"
Yaa feeñ ci Yoofu gééja waay
Sa tur wi siiw na dootu fey
Boroom jamaano maa la woy
Nga may nu,dig nu,doo naxe
Sëriñ sa jang Alxuraan
Ba xam'Chariihatu" ak cosaan
Ki Yalla yonni fii Zamaan
ñu bañ ko,xaw ma seen pexe
Giñ naa ci Laahu kiy Boroom
Ibnu Maryaama yaa di moom
Yalla la tann doo moroom
Ñi gëm te woolu ñoo texe
Diggënte Beyti Maamur ak Yaraax
Diggënte boobu dand na
Te lef ma yaa na,Ruuhu laahi
Ngawar la,naar wa pepp na
Njool war na gaal ba dem Yaraax
Jakkeer la war fanaani Yoof
Jullee fa Njool ma,gëm ya naa
Ko,Ruuhu Laahi,doy nga noo
Ba Maam jogéé,jëm Jamma Laahi
Ñi gantu woon xëccoo na koo
Ña wuyyuwoon Madiiné Laahi
Ci yoonu diine yobbu koo
Bésub keroog la gééj ga neex
Ngor ak, Wakaam ya seede koo
Caaroy,Ndakaaru,waa Yaraax
Ñu naan ca mbeex ma,jaale koo
Haalim ya jomlu,gééj ga gëm
ba jox Madiine ak ruu-am
Lu tee werante fey,nu gëm
ba gaa ya jiituwoon texe
Jirim ya jooy na ba sëngeem
Njool ma ñëw na,seen rongoñ ya fer
Jullit yi wéétoon bay xelaat
Donoy Madiine wacc naa
Raxas xolam ba muy fayaax
Lu cay lu bon mu rekki koo
Mu mel ni saaba door a baax
Lu cay lu gën mu dolli ko
Ku déglu saari Alxuraan
Ña gantuwoon la fay tëkkoo
Ñi jomlu diine ngir kiñaan
Malaaka yaa ngi leen ëkkoo
Ku nekk fooreyë boo nuyoo
Sa mbooti xol mu raññe ko
Kerook mu jam la doo feyyoo
ba loo xamoon nga fatte ko
Ni baay Libaas di def"rijaal"
Bu dee mbëriit mu daane koo
Mbiram manee fu ko misaal
Ki gëm te woolu xam na ko
Li Yalla sante doo ko jaas
Ku farluwul nga jéppi koo
Taasanxa diine,yaa ko daas
Ku bañ nga rendi sañ nga ko
Ku lamb saa buumi cofeel
ci Baay Libaas,na bayyikoo
Bu wooluwul ki nuy texeel
Guddeek bëcëg nu muslu koo
Samag cofeel di law ni ngooñ
Ku saytu paaka jublu koo
Nu ñaan ci Buur bi bañ ku tooñ
Musël ga yal na jiitu koo
Sa diine dootu fey wallaay
Yallaa la woolu jox la koo
Yow it nga woolu Ruuhu Laay
Mu jiitu,gëm ya topp koo
Séytaane mel nikkik fital
Di takk jëm ci buumu xol
Damaa bëgoon lu may ragal
Nga mey ma tul gu may "sawe"
Ndax waaji man damaa léjël
Ba mel ni kul ma fëkk jël
Moo tax,ma ñaan si sam ndimmël
Ndax mbër nga,yow man nga ma rawe
May ndaw lu tollu cig bëggam
Muy dox di yonni ay ndawam
Yu bon di sante aw xambam
te xaw ma boor bu muy xawe
Sëriñ si mar na bay xundooñ
Ñu dem ba Makka weesu koo
Ma jooy rotal samay rongooñ
Da ñoo gëlëm te rééré ko
Ku weddi ndaw te laajuloo
Bu ngeen layyoo mu sank la
Ku Yalla yonni,ngay jotal
Mbindééf yi,booba wacc nga
Ki sot xalima,soos daa
Tektal yu woor la daa xalam
Ña saytu téére ya gëlëm
Nde boon ñu raññee aw meloom
Kurél bu yiw bi fawxa ngeen
Ku dul yonnent bi ñee na leen
Lu jiitu tey la Yalla noon
Di ngeen sujjoot ci Muhamadoo
Li ngeen di jëf,li ngeen di wax
Li ngeen di jorta wooru maa
Li ngeen di lééb la Yalla wax
Amaana moo di atte ba
Jullit yi maase ngeen ne Njiin
Sore na waaye dektu na
Li ngeen di waa ja léép malaaka
Daldi saytu tampe ba
Mbooleem li fooréyiy yaxal
Du ñu fi def lu gën jubël
Sikar te boolekaak matal
Jullee ka ñaan ci Muhamadoo
Bu nuy siyaari Jammalaay
Yooryoor ba Maam nangul na nu
Guddik diiwaan la gëm ya yéék
Kerkeraani Muhamadu
Da noo gisul ku mel ni Maam
Limaamu Laay te déggu noo
Ku melni Seydi dootul feeñ
Ci dun bi woor na kiy fexe
Ñi gëm te woolu noon na seew
Nga woote,yow ni yonni ku
Ku bañ sa diiné dey ku beew
Jëfam ja Yalla xoolu ko
"Baxril buxxuri Mustafa
Wa laa nafaasa xad kafaa
Li kambareen wa Yoofa haa"
Si lim bi nuuri Muhamadu
Yonnen bi won naa num ngirëm
Xallal nu yoonu Ajjana
Nu santa Laahu woy Rasuul
Bu yiw bi saytu caabi ja
Nabee waxoon ne saa ginnaaw
La waay di ñëw di leen fi woo
Liggééy ba faw yool ba nééw
Du tol ni yoolub Muhamadu
Xam ngeen ne jaam bu bañ Boroom
Du am taranga am ngërëm
Te yoonu laaxiraam,xelam
Du dal,du am ku ko yërëm
La woon fa Makkaak Medin
Ñoo ka boole Jammalaay
Ba suuf yëngoo leeri Jabeel
Ya "turné" wéy fa sowu ba
Yalla la yonni ngay ndawam
Nu gëm la soobu ci ngirëm
Te Yalla daal a fiy Boroom
Ku bañ du tee nga di laram
3 - BISMI LAAHI RAHMAANI RAHIIMI
Xundooñ ngeen Njiin na ngay fellax
Ku mos,muy gééj gu neexum ndox
Ku nann,bilimbaane,dootoo dox
Di saytu sa ndaa di rootaani
Te Muhamadu moom riñaanoon na
Fa Makka ba Njool ma jalloon na
Limub asamaaw ya déggoon na
Fa Yalla la tiiñ ka jangaani
Mu dellusi jang,dem faati
Ki labbali yoon wi moomaati
Bu leen bañ céébo maa ngeeti
Ku bañ wile waame xaaraani
Wolof nga nu feeñu bés nikki tey
Wolof laa namp woy la ba tey
Liggééyal Yalla moo gëna yay
Mu sant nu,noo ciy kontaani
Ñi rééroo sanku ngeen ku ci bañ
Ki Yalla yabal,waxam ja du deñ
Te Mahdiyu mooy boroom sañsañ
Te mooy ubbi "baabu jannaati"
Mahdiyu laay fajal na nu mar
Ba Njiin wootee la foore ya wor
Sunub sang jooy na,Saaba ya xar
Rogon yay "baxru rahmaani"
Tanxal na ca soppe yaak bañ ya
Junniy junni naan ca leeram ya
Nit ak jinné woo na leen dunyaa
Ngiréék ñuy jaamu Rabbaani
Ba Njool may waaja feeñ ku jubul
Ka jooy fa safaan ba,jaam ya yëgul
Niiraan jooyle kook ya mu sol
Rogoñ yaay "baxru Zulmaani"
Labal na ca lenn ciy fooréya
Bu ñuy firi boole seen tor ya
La ñuy firi wooratul jaam ya
Ba Njool ma ñu jiñ ko seytaane
Ba Mahdiyu feeñagul amu fi
Ku fiy wone yoon wu jub néwu fi
Li Yalla bëgg ak li muy tere fii
Lu ngeen bañe Baay Libaas la ne
Barib xamxam taxul mana dem
Siraat am ndok la,bés bu ñu jëm
Ki fiy wone yoon wi moo mata xam
Te farlu ca laa mu santaane
Ku tektaluwoon ci waa ju gëlëm
Da ngay mujjé réére mbir ci waxam
Ku réére jamano,doo mana xam
Boroom a nga leen di dénkaane
Xëccoo leen wéétëluk Fari ja
Bu leen jangaani ngir daraja
Yonnent,foore ya mooy dono ja
Ségém rombul ndigël daa ne
Da nuy tagg Njiin boroom jamano
Ki woote,nu woolu kay naxu nu
Da fay gindi ruu yi booleek nun
Nu dellu ko sant "hamdaani"
Bu leen xeeb jaam bu aw ci ndigël
Ndigël du ndugël, ragal nanu bël
Boroom gaal gi moo nuy jël
Yoobu nu pééy ba nuy naane
"Al hambdu li Laahi Maaliku naa
Wa salli a laa Muhamadu naa"
Ku lay mana sant man raw naa
Ndegam du ka siiwé "alfaani"
4 - BISMI LAAHI RAHMANI RAHIIMI
"Badaa xuruubiyu samsan
Wa anta Mahdiya Laahi"
Boroom cosaan ya ko jangoon
Da ñoo xamul Nabi Laahi
Boroom junjun ya fa Makka
Moo moom junjun ya fa Taayif
Boroom junjun ya ca Firdawsi
Moo di Baay ñangu Laay
Bu gaalug diine ga teeree
Ku ñaanul paas di nga tardee
Limaamu"safinatu saadati
Xawsu nixmatu Laahi"
"Imaamul il mursaliina
Wa xaatimu nabi-iina"
"Liwaa-ul hamdi" nga tallal
Nu gis ko gëm Nabi Laahi
Ku naw sa alluba weddil
Te ñëw mu won la nga daanu
Mu sol la leer ya nga di sabbaa
Ba naan Alhamdu lilaahi
Limaamu Laay, ba mu wootee
Fa gaaña rééré fa sowu ba
Yatam wa dal, mu ne tuub leen
Ba gaa ya nooy Na bi Laahi
Limaamu Laay ba nga taaloo
Ba leer ya jolli ca biir Yoof
Lëndëm ga daay na ba naawal
Xérëm ya,ngay Nabi Laahi
Boroom xérëm ya da ñoo gaaw
Tabax jumaa ja ca xeer ya
Mbaaxam ga tax na ñu booloo
Ne laa ilaaha illa Laahu
Toxal nga biddaa ci sa diiné
Nandal nga mag ña ca leer ya
Lakkal xaleel ya fa nekkoon
Ñuy xañtu diiné "li Laahi"
Yaay gééju leer gi di baawaan
Dekkal nga xol yi fi deewoon
Ku aw sa ngir mi fasoo naani
Tuubaaa, woolu na Laahi
Biddiw ba xotti na leer ya
Sa lay wa jééx na fa jaam ya
"Illaa bi hadrati man xaala
Ajibuu daa-iya Laahi"
Nit ak jinne la ko boolee
Goor ak jigeen na ñu jaamoo
"Balaxta sawta ka sarxaam
Nawarta xarba li Laahi"
"Balaxta sawta ka yamiin
Balaxta sawta ka jawfu
Muhyi fuhaadi faxiira
Ibaadi najiya Laahi"
Li Yalla sante jaamam yi
Fooreeyaa ko di juuyoo
"Jasaaka Mahdiyu Laahi
Wa fayta huduuda Laahi"
Yaaram bi nee wuloo"baa"
Yaarambi nee wuloo"siin"
"Anta miftaa u bahril
Uluumi bi Bismi Laahi"
Sunu Yonnent ba mu faatoo
Werante waa nga ca réér yaa
Da ñoo xamul xalifaam
Seydinaa Isaa Ruuhu Laahi
Ba mu bawoo béyti Maamur
Saxaar la war ba Yaraaxoo
Boroom cosaan ya ko jangoon
Da ñoo xamul Ruuhu Laahi
Waxtaan na faak ña mu andal
Ba jiite leen julli ñaan
Sunu Boroom defal na ko ñaanam ga
Muy "Wixaayatu Laahi"
Sagn gi Yalla Sageel la
Fa noon ya ak Nasaraan yaa
"Tamuru bi xaybati him
Zu kiraamti, inda Laahi"
Jirim sëngéén ñetti fan
Ba Njool Medina¨ñëw la ñu reeo
Mu bégël jullit ña ñu sabbaa
Mu daagu jëm Jammalaahi
Ñu raam sujoot,ba ñu noppee
La seen rongoñ ya di maayoo
Njool ma jullée sunu yaaram
"Nazalta yaa Ruuhu Laahi"
Kerook la gééj ga di sabbaa
Lewet ba gëm ya di naanoo
Ku naan ca teen ba di sabbaa
Te sant Baay Ñangu Laahi
Buur Yalla woo na ko Pééy bub
Ku dootul moom du fa jaaroo
Mboole mi ndééy la ca gën
Muhamadoo ko déglu fa Laahi
Ngawar gu réy ga nga naaweek
Buraax ba dem ba ca Pééy ba
Noonam ya koy bëgg roy
Seen masin ba sew na fa Laahi
Sa waay du jax du jaaxle
Lêndëm gu tar du ko laaloo
Leeram ya doy gëne jolli
Mu am "ridwaanu li Laahi"
Laa ilaaha illa Laahu,du nu sappi
Ngir mooy junjun ya ca Pééy ba
Yal na mujjug sunu "Kalaam"
Di laa illaha illa Laahi
Laay laay la laa illa laahu
Woy leen Jabeel ma ca leer yaa
Limaamu Laay li nu lay woy
Du jééx du xaaj dunu tayyi
5 - BISMI LAAHI RAHMAANI RAHIIMI
Jantub diine lislaam
Da ngaa fenk ñuy miim
Nu gëm woolu leer yaa
Ngi baawaam fu ne
Baay Laay ngeen ne jangul
Mu woo leen, ñu gantal
Ginnaawam ga daaneel
Fi haalim ju ne
Jinnéék nit la woowoon
Ci diinéém, ku teewoon
Te doyloo ko diiwaan
Nga doy ko lu ne
Da ngay jantu njolloor
Ñi gantoo ngi ciw guur
Te lii woor na kuy gor
Ci diiwaan bu ne
Rasuuloo ilaahi
Ibnu Abdulaahi
Moo leen woo wa Laahi
Madiine fi ne
Yallaa magg mooy Buur
Turam woowa nay riir
Ba seen xol sangoog leer
Mag ak ndaw ku ne
Rasuuloo ilaahi
Mahdiyoo ilaahi
Bi Laahi wa Laahi
Ku bañ "pertana" nga
Na ngeen déglu baat bi
Da may woy Yonnent bi
Booleek sant Rabbi
Te moo war ku ne
Wolof yooya laa miin
Te moom laay wuyoo Njiin
"Sekarteer" amul yoon
Ci Yonnent bu ne
Al hamdu li Laahi
Wax ko war na noo
Ngir moo feeñal Yonnent
Ci biir xeet wu ne
Gééjug leer ci Soodaan
Xamul yaa ngi rootaan
Sangoo leen ko nuy naan
Moo gën ndox mu ne
Seydi Ruuhu Rahmaan
Donoy Mahdiyoo
Ba yaaram ba laqoo
Ba tey yaa fi ne
Ba muy woote diineem
Te ñuy bañ tariixaam
Nga dib taaw di seedeem
Ba tey yaa fi ne
Da ngaa jub, sa ñoñ jub
Woyof toyy niw xob
Di jambaar def ub tab
Siggil yaa fu ne
Daraapoo bu lislaam
Bi yaa ko ame
Bu leen yoon wi rééréé
Nga sañ ko wone
Boroom xeej bi yaa jaam
Ñi daarloo ci xamxam
Ci seen kow nga jël ndam
Siggil yaa fi ne
Da nga yiw, yéwen taaru
Doy képp kuy waaru
Séydéy boroom daaru
Yaa koy wone
Ku doyloo sa xamxam
Ba laajoo ñu gënë xam
Do taggook i jamjam
Yu réy wet gu nee
Baay Laay gééj gu dul jééx
Te raw lem ci ag neex
Te lamboowul ag tiix
Tanxees a koy wone
Setal seeni ñaaw ñaww
Nandal gaa ñaa ñuy soow
Xanaa xaw na ñoo naaw
Ku man dey wonee
Ku lay roy ci bi "xarnu"
Feeñul wonee
Da ngay njiit ci lislaam
Bi yaa leen tanee
Gënël ngël nu nuy ndey
Gënël ngël nu nuy baay
Te yaa gën sunuy maam
gënël nuy junné
Ku lay bañ du kontaan
Lu waaj waaj du waxtaan
Bu walle ñu reetaan
Lu man man mu ne
Ba Njool may taxaw
Ben si tey ngay xaree
Te wééeroo sa gannaay
Muy dal saa su ne
Jiyaar jii si baatin
Bu doon "Zaahiroo"
Ñu janloo nga daaneel
Ci goor ay junné
Ay jambaar nga andal
Ku lay sooru gental
Sa gannaay ya koy dal
Du wér bay wunni
Liggééyal nga Yalla
Liggééyal nga Baay Laay
Ba jot seen Ngërëm
Doo fi maasun gune
Ndawal Buur ku bañ weej
Ku réyréylu sew ruuc
Soppeem yaa nga noon
Ngééj ñu xam faa mu ne
Li tax diine yaa suux
Ba Yonnent jëkkee juux
Boroom tééré ya xoox
Di bañ wet gu ne
Tawreet ak Linjiiloo
Saboor diig nanoo
Furxaan teew na gacceel
Ña noon nii du nii
Ñi daan bañ Rassooloo
Siraat ñooy rëpééloo
Tuubéén ñaa ko doyloo
Batey ñoo fi ne
Bu dul konte Baay Laay
Lëndëm sank fuy gaay
Ki tax ngeen di laay laay
Yallaa ko yonni
Da nuy ñaan ki nuy mey
Mu yobbël nu buy doy
Ba cik mujj nu far wéy
Ci ngir mii nu ne
Sañseel gëm yi ñuy bees
Giroo ngir mu tek lees
Booleek ndééyi depess
Yu jëm pééy bu ne
Baal niiw yu wéy ya
Jéggël gëm yu teew ya
Ña laqook soppeem ya
Si nit ñeek jinné
Dundël diine lislaam
Ci barkeb Yonnentam
Di njiitam di soppeem
Da koy may lu ne
Da daan rey di dekkal
Fu lëndëm mu leeral
Ba gééj wéx mu wéxal
Ñu naan saa su ne
Ay kéémaan nga andal
Te say seede jééxul
Ku laamlaami laajal
Ci mag ñii fi ne
Li war yeenu "haalim"
Ci bii "xarnu" mooy xam
Boroom, boole kook gëm
Te aw cim ngirëm
Yeeteetoo ñu yeewoo
Xanaa ber sa saawaa
Sa ñoñ nangi faawaa
Ba réér cik lëndëm
Bakkan jartil loolii
Da ñuy dee ñu suuli
"Fa la sakk xawlii
Axiixum hikam"
Da nuy sank njalbeen
Jëndeek mucc, mu lew leen
Fa firdawsi nuy béél
Ku nekk taabalam
Ku dem Tuubaa gis pank
Yay daagu dox ndank
Luy loolu seen tank
Yay temtemi
Yaram yépp koy yëg
Kawar yépp koy yëg
Muy banneex bu dul dog
Bu dootul yeme
Su Buur Yalla santee
yonnentaam mu wootee
Ku wuyuwul bu sottee
Nga réccuk mujjam
"Fa yaa ahlu soodaan"
Yonnent feeñ na woo leen
Da ngeen gantu nee ngeen
Du moom, noo ko gëm
Bu dee fooréya, lay jeex
Nde tektal ya day weex
Ca tééréém, da dul neex
Dey jeexal xolam
Ku fiy jaaxle laajal
Ñi xam ñoo di tektal
Ñi séytaane rééral
Ba tax ñoo gëlëm
Njiinoo njiin jibul neen
Njiinum Yalla raw leen
Ëllëg teel ñu laaj leen
Fa Saam ak wallam
Ku bañ yërmëndey Buur
Kerook moom lañuy door
Mbugal wër ko muy nuur
Du taggook loram
Yonnent baa mu woottee
La saabaam ya footee
Ku noon "aamanaa"
Tey nu laabal xolam
Ci saabuy Boroomam
Saxoo tur wa mooy xam
Xalam muxjizaatam
Te fagguy ngërëm
Yallaa yonni Baay Laay
Ci nit ak jiiné
Na leen woor ne Séydééy
Borom "xarnu" bi
"Allaa-uma salli
A laa xayru rusli"
Ñi Buur tann boolee
Ñu sëlmël ci ñoom
6 - BISMI LAAHI RAHMAANI RAHIIMI
Siyar naa la Baay Laay yow mi doyloo sa Buur, woo ma
Siyaar naa ñi and ak yow, digéék yow ki am worma
Sa Buur baa la doyloo sol la leeram ya ngay woote
Siyaar naa la yow Baay Laay, siyaar naa ci say Saaba
Ku siyaar sa xol dootu wow, dey tooy ngireek mar wi ciy baawaan
Ku yaakaar ci yow doo sooy bay dellook merum awmaa
Nabeey gaal gu réy guy jallé mooy Maam Limaamu Laay
Ku am gaal te am say mool, ne looy tiit fa jallu baa
Nabeey gééju leer, duusam yu réy yaak na ñuy bëbe
Njanaaw yaa ca naanoon leeri waxyoon la ñuy sabe
Al hamdu li Laahi, nuy sant Buur ngir ga Maam Libaas
Sunu soppe, soppe Laahu, Séydee di xejj ba
Ku diis yaa ko yan Laahu, sa Yonnent ba seede ko
Sa yan boo ma yan ñaan naa la dooley na may fabe
Jullit yeen ñi gëm Baay Laay dëggël Seydi kiilu ngeen
Ku si weesuwul buntam ya booy fëgg muy ubbi
Rafet gëm ci Baay Laay moo di jééma roy ciy jikkoom
Waxew yiw, jëfew yiw mandu moo gën ci taalibe
Ku xemmem ndënal ñoñ Yalla da ngay déklu woote ba
Nga am xel, te am teggin, di toog ak ñi koy tibbe
Te bul déglu gaa ñi regg bay dox di puukëre
Lu dul diine duy teggin, dañoo mel ni ñuy sebe
Ba Mahdiyu woote gaa ña jiitiwoon dañoo rawe
Ba tey ñu ngiy daw, may daagu ndax man dinaa dabe
Ma dib lar bu dib laayif, te def pank muy tooñaan
Ba saay wax ak saa jëf, seen bon gi tiital ma
Damaa soobu cib gol, sopp gannaay, ragal namaa
Lu fiy daane, booleek rab yu bon yeek na ñuy tëbe
Ma jébbël la saay mbir, yow miy njaccaar ma silmaxa
Tënëxtooti may réér, am tum bi ommat ma
Li nuy sakku ciy bon bon, ba tee noo rafet fa Maam
Lu tee noo labat baaxam ga ba weesu dénd bi
Ragal naa sa may jëf, xawma jan jëf la nuy mujje
Bu yemmook ju ñaaw muy coono, saa san la ñuy ñibbi
Bu leen deeti xeeb kuy woote, Buur Yalla moom du ñëw
Dafay woolu ay soppeem di leen yonni woote ba
Ku dem pénc may layyoo da nga weddi woote ba
Nu faf gëm Limaamu Laay mi xam yoonu jallu ba
Da noo bon te nééwuk jaamu, nan seeti Muhamadu
Ci dunyaa, na ngeen seet Maam Limaamo di jallu ba
Man dey xawma waa dunyaa lu ñuy bañ ca woote ba
Nde Baay Laay li muy digleek a wax, moo di jallu ba
Di leen japp tey sellal di laay laay fa jakk jaa
Li Baay Laay di diglé ngoog, looloo di jallu ba
Di leen wax ci seen mbokkum jullit wax ju teey ju baax
Li Baay Laay di diglé ngoog, looloo di jallu ba
Di leen xool ci seen mbokkum jullit wax ju teey bu baax
Li Baay Laay di diglé ngoog, looloo di jallu ba
Guddig "Leylatul israahi" la jaaroon fa jallu ba
Ba déeyook Boroomam Laahu, may gaa di jallu ba
Siraat gééj gu réy ay duus, te dey xiiru noonam ya
Nu ngiy gëm Limaamu Laay mi nuy jalle jallu ba
Dafay xool Boroom tangaay wa, feyloo ko beelem wa
Nu ngiy gëm Limaamu Laay mi xam yoonu jallu ba
Boroom mey yu réy, dey joor nu tallal sunuy ndijjor
Ba maanaam li gééj giy fuur, te ya raw tabeel mey ma
Ku am saabu, am ndox tax nga naaguy ñimeñ taq
Da ngay kum xelam des mbaa nga xés wuyu woote ba
Bakken def na noon buy wor boroom def ko muy barmool
Digaan leen nu sakku man bakken, won ko fiy ngir mi
Sëriñ seeti leen seen tééré, niiraati Mahdiyu
Bu ngeen raññewul Baay Layy, Limaamoo di xejj ba
Sëriñ dénca leen seen tééré ñëw laajsi Ruuhu Laay
Nabiyu Lummiyoo feeñ ci Yoof, moo di jallu ba
Ku ci woolu sab xamxam ba yaakaar sa alluba
Ba tax ngay jundum gii gééj, te doo jall jallu ba
"Salaatan wa tasliiman alaa Seydi waraa"
Maam Limaamu Laay leeram yaa moo raw yu jant bi
7 - BISMI LAHI RAHMANI RAHIM
Jantub diine yaa tiim gaayu gëm yaa
Ku mar di nga naan ci gééj leer ya ngi baawaan
Al hamdu li Laahi Rabbil aalaminaa
Ndégem noo gëm ki Yalla yabal jamana
Addina yaa ka mane gan doo nu naxtaan
Nu ngiy yaakaar ki nuy mane gane ca Rilwaan
Da lay mane gan te gaaw berndeel la gay béén
Mu njuuy la nga daanu cim kan rééré ak neen
Sagar ak i yax, lu leen geuneu ñaw la dooréé
Ku kay beugg miim, bammeel seere ñaaree
Bu leen ñétaan, ki addina jay ba dooleel ko
Dina wor, dina njuuy, addina maa ka tuumaal
Bu leen réyréylu, réy Laahoo ko yelloo
Ku réylu ba dee malaaka ya jël la sewloo
Ba Baay Laay wootewul dunyaa leudeum na
Geureum leen goor gi moo ame leeru diine
Ku xam Baay Laay te xam Nabi Laay ne mooma
Mahdiyu Nabi Laay a feeñ; moo woote diine
Jullitoo wooluleen, sang féñ na Soodaan
Ku Yalla yakkal nga suur, na nu jomb xaaraan
Mbindééf dina xool, di njéér te du gis ngëneel ya
Ba Yonnent feegn na ci biir Yoof, noo ngi jaamu
Mbindééf a ngi ñuul, te lamboo leeri Yonnent
Ba leer yi di tuuru ci gééj, nuy naan ci mbeex mi
Ku am xamxam, te ragnéé leeri Yonnent
Da nga wara xam ne séydééy jiite yoon wi
Sang Soodaan nga, Seydi donay Madiine
Bu leen laamlaami, goor gee woote diine
Limaamul Mahdiyu Soodaan Yoof la feeñ
Wallaay Laahu la soob du danu ko jiiñe
Du jang ci tééré, du ci xalimaam, du daa ja
Kiñane dafa réy, nde boon ñu ne moo di waa ja
Ba Nabi féégné, ca Makka, ba leer ya baawaan
Xérém ya tasaaroo, Nabi tere leen bidaa ya
Ku geum Nabi,geum Limaamu Rassoulou Laahi
Gëlëm dafa réy, nde Kaaba ga, Jammlaahi
Ba Njiin feeñé ca Yoof, bañ yay kalaame
Ndaxam da ñu réér, nde Yonnent, moom du sankoo
Bu doon, ku fi féñ ñu agga fa laaj ko yoon wa
Bi Laahi du nu réér, nde sammaan miin na saawa
Bu leen ñétaan buuri dunya ki liitam
Juddook dee moom ku koy def, Buur du nawleem
Sikkar sa di riir, bañam ya naan lee mu saankoo
Mu naan saabaam ya asal du ma seeru Kongoo
Ba Njiin waree gaal bañam ya di ree, jawaanoo
Ba saaba ya naan ko Njiin doo teeri bayyi nu
Rogogn ya di tuuru, bu doon wurus it di marjaan
Ginnaaw jooy yooya, Laahu yaa di Rahmaan
Ba gaal ga bañee ca Béér la ñu gëm, jalooréém
Ba Kongo belseek Wiirwiir gnoo koy dégg ndéém
Xayartu Madiine, Baay Laay, jeul na ndam laa
Ku dem Ilayiina, muy jaayook njañam laa
Ba Njiin feeñé, la robiney leer ya baawaan
Ba rééw mi limbaane, Soodaan dootu naanaan
Tanxal nu ci yol mi, yow miy Njool nu naanoo
Ba mandi ci leer yi,Baay Laay yaay limbaane
Ku langook ñaari yol loo deeti rootaan
Da ngaa wara naan, di sangu say bagn di ñéétaan
Beuceug la ko Buur ba woo, ba mu réér mbindééf ya
Seumbéél ko sa leer ya muy jaayook binnéém ya
Bu daa bilibaane, ñuy gaawtook a foofaan
Malaaka ya door xéreum ya ñu weesu foofaa
Baay Laay woote na, wacc na, moom jotal na
Mbindééf yay jaamu, mu tiim leen, seede gëm ya
Ba gééj sabbaa, Aras yeugou, woor na Baay Laay
La seen pexe jeex, tereetu ñu gaa ña Laay Laay
Sang da nga taaru, tabe, ku la séén daldi maaree
Rafet gaw gaay, xanaa marjaan nga dooree
Da nga tabe, muñ, di jambaar, doy nga waaroo
Rafet ngab yar xanaa baatin nga dooree
Da nga rafetal sa diine ba tey ma woy laa
Ku fiy ame diine, Baay Laay jeul na ndam laa
Li nuy bon - bon di saw gaay, yaa nu wéétéé
Boroom Ridwaan sang bi yaa nu jiitéé
Da ñu noon wird ak sikkar dina fey ca sowu
Limaamoo woon, te mu nga war gaal di joow
Ba pake bay déqi ba pat may xotti mbeex ma
Malaaka yaa naan ka Seydeey jiité soodaan
Ba tey leer yaa ngi baawaan rééw mi fess na
Ñu ngiy laay laay,di roy Baay Laay ci diiné
Baay Laay noon na Séydeey jiité gaa ñaa
Ku bañ Baay Seydi na nu jox, maa ko wooloo
Boroom "Ridwaan", ku la woy naani Tuubaa
"Al hamdu li Laahi Rabbil aalaamiinaa"
Al hamdu li Laahi Rabbil aalaamiinaa"
Sangub jamaanaa ngi, Soodaan woy ko lay jééx.
8 - BISMI LAHI RAHMANI RAHIIMI
Bi Bismi Laahi ma deeti woy Madiné
Wolof la may mottalikoo saa yééné
Tey ba ëllëg nuy wuyu Maam Limaamu
Moom ki nu woo ci ngir mi, ngir nu jaamu
Al Hamdu li Laahi, nuy sant Buur ba
Jagle na nu sang, tabeel ndijoor ba
Séydi Limaamul Mahdiyu taabeem ga
Jéggi na waame, raw ginnaxu gééj ga
Dogoonkoon ak Mahdiyu laay mi woote
Kuy jééma leeral mbir mi yaa koy wuute
Waxtu wu jot nu japp, ken du tiimoo
Lottal na Lawliya yi, noo ko moomoo
Sikkar guddéék bëccëg ni riiru gééj
Yonnent jagoo nay jungjung du ndiij
Nu sant doomi Alsaan ak Seyni
Moom ki nu woo ubbil nu yoonu diiné
Moo jëkké fi lakkal xaleel yu tuut yi
"Wal ixtixaadi sawjan lil banaati"
Ponki julléék njapp mi ngeen maggaale
Fu ngeen fi jëm, Yalla di seen andaale
Goor ak jigéén, mag ak ndaw xaleel
Jaamu gi, noo si maase, naaj ak teel
Ku Yalla yonni, noo ko mos ni siiw
Loo wax nu woolu, dootu nun di beew
Bu leen werante, baatu goor gi siiw na
Nit ak jinnee ko déggandoo te woor na
Baay Laay ne"Aajibuu daaya Laahi"
Muy wax ja woon ca yaa Rasuulu Laahi
Moom bés bu ne mu mel ni gan, nuy teeru
Ñi gëm te woolu saa su jot ñuy waaru
Mbooleem sëriñ si, raw na leen si waare
Tereek a digle, lii la Njool ma doore
Mbooleem hu fuy teyteyluy laaj, déggoon na
Waxam ja démb, tey donnaam ja teew na
"Sayaaratun daabatun Ruuhu Laahi"
Yallaa di tax nga war ko waaw wa Laahi
Gis texe, maa le seeru, man kañ naa la
Gëm mucc, weddi alku, woolu naa la
Yaa wax nu dégg, jëf nu gis, mbër waadaa
Wuutewulaak doomi Maryaama Soodaa
Diggënte Beyti Maamur ak Yaraax
War nga fi daaba, muy ju gaaw, du xoox
Jub nga Yaraax, labbe ya doon la teeru
Sa lampi leer sëggël na leen ñu yiiru
Nga wacci war Maanatu Laay jëm Yoof
Jullee fa Njool ma, boole doom ta uuf
Sat "muxjizaat", lottal na gaa ñay séénu
"Wa lan yaruu mislu ka yaa lamiinu"
Ku mos di weddi, yaa ko won mu seeru
Ku fuy tëbëntu ngay jiñax mu jooru
Kerook ba Maam ñibbee fa Jammlaahi
"Xad hayaru ashaabau fi Laahi"
Déelé bi suuf ak asamaaw yi ñoom
Jooy na ñu Njiin, jooyi guneek seen maam
Gééj ga di jooy, rongoñ yu tey yu neex
Ku sëgg naan, ba siggi waaru giix
Fekkoon nga mbooleem gëm yi jooy ba jééx
Sab taxawaay tax na ba seen xol fééx
"Ibnu Asan Séydinaa Limaamu
Abu Issaa Ruuhu Rabbil xadiim"
"Man xaala ajibuu daaya Laahi"
Amul keneen ku wax waxam wa Laahi.
"Wal mujrimiinal musrikiina naaluu
Xusraanu inda diina kum maxfuuluu"
Bu leen ragal keneen ku dul Ilaahi
Ak Yonnentam ba doomi Abdalaahi
Mbubbum ragal, Yalla fu gën baraaya
Moo gën sujéé ka dox di bif daraa ya
Ruuhu Ilaahi,kiy donoy Rasuulu
Ibnu Imaamul muntasar, laa woolu
Ñay mbër ca Yalla, seeni yan nga boolé
Saa sépp man, dinaa la ñaanal doole
Abaabakar, Umar, Usmaan, wa Aliyu
Yaa boole seeni mey di jiite gaa ña
Kuy jééma gotti saa mbër it bul naagu
Ndax wéqu weén tereetul ñay wa daagu
Ña wuyuwoom Yonnent ca ba mu woote
Mu japp gaa ña, boole xol ya footéé
Ku fuy tëbal ci Yalla jii jamano
Na gëm dogal ba, mbaa du weesu daanu
Ku weddi alku, doonte "lawliyaawu"
Nit ak jinné si yam, na ngeen si yeewu
Yallaa ma yonni, moom la wax fa Yoof
Ba Njiin jibéé la bokk yépp keef
Ñu naan ko wax ji réy na yaa Limaamu
Mu yékki baatam ba ca kow, ñu yéému
Jangul, bindul giseesu fook i tééré
Xam xam ba cab dënnam xajul ci tééré
Yonnent bu Yalla yonni lii la waare
Ndaw ñaak jigéén ña gëm, sëriñ sa réér
Lu ngeen fi deeti jang, safara yay na
Léébu wolof lawon ca yagg, feeñ na
Feeñoon na Makka gaa ñu baax ña booloo
Sette waxam ja, muy ju woor, ñu wooloo
Am ca ñu jomlu, gantu ngir kiñaan
Ku and ak ñooñaa déég ba doo ca naan
"Xafadta diini kufra Ruuhu Laahi
Abaa ka mursalum fi diini Laahi"
Ma wax la tuuti fii ci say jalooré
Ba gaa ña dégg, Saaba yaak kay seere
Tabeek soxar la mbër yi mos daan boole
Kuy bañ ci ngir mi, ñoo ko daan yan doole
Yalla la fal "Aamiral muuminiina"
Ku weddi fii sa wax, jëfam ja neen na
Sa tur a jiit sa taxawaay ci dun bi
Deefu la jaawaleek keneen ci gééw bi
Baay Laay rafet na diine, Njiin du maas
Ku weddi, sangutee fa Maam Libaas
"Wa man yarju illaa jinaani Laahi
Xudaamu u faxlam u Ruuhu Laahi"